小學時寫我的志願，每次都係寫「幼稚園教師」，因為我好鍾意小朋友，覺得佢好真，唔似得大人咁虛偽咁多機心。但我中五會考考得唔好，爭以為做唔到幼稚園教師，好彩父母同我講話IVE有得讀幼稚園教師文憑，我就走去讀，結果如願以償，3年前入幼稚園做音樂老師。
雖然我考到鋼琴演奏級程度，但細個只係坐定定度學琴好悶，根本就唔開心。上音樂堂時，見到成班小朋友好似我細個學琴咁，全部只係坐定定聽我彈，唔知邊個識邊個唔識，都幾辛苦同唔開心。加上返工先知學校好多是非，其他老師對住我就會笑笑口，背後會話我冇經驗唔識教，我知道之後好難過，但唔知點面對。一刻好懷疑自己能否好好當一個老師。
俾肥仔撞到入醫院
自當上老師之後，發現好多小朋友都有心理病，好似其中一個患過度活躍症肥仔學生，成日都不受控咁四圍撞，我亦被佢撞傷條腰，搞到要住成個禮拜醫院；事後肥仔有同我道歉，因為知佢控制唔到自己，所以我冇嬲佢，反而令我重新領略音樂樂趣。
肥仔因為個病，成日俾人罰企冇得上堂，我好想幫佢，就畀佢上音樂堂，發覺佢原來好有節奏感，聽到音樂就會好開心，跟足我指導去做。原來音樂對佢個病情有幫助，我都覺得好鼓舞，於是我想改變傳統沉悶教音樂方法，走去讀好多唔同音樂班，例如節奏樂、彩虹教法，學識用唔同工具、透過遊戲或顏色，去教小朋友樂器，增加互動性，令佢投入度大增。
讀音樂治療幫學生
直至舊年，我知道音樂治療樂可以更有效治療到一患有心理病小朋友，例如自閉症同躁狂症等，就索性辭職，諗住用1年時間去修讀。同時我亦唔同學校開設私人音樂班，以小組形式教學，希望到更多教學經驗。家自己開班，比起之前幼稚園辛苦好多，但唔使理人事關係，亦可以決定課程內容，感覺好舒服，好有成功感。雖然患病小朋友有好多，但希望幫到一個得一個。
其實我好唔捨得以前班學生，有次因為太掛住佢，專登返學校探佢，估唔到佢仍然記得我，仲喊住咁話掛住我，搞到自己都忍唔住喊，不過，我深信讀完呢個course，就可以幫到更多小朋友，亦因為佢，音樂重新成為我興趣，亦知自己可以成為好老師。
留言列表
